پرینت

شاعیرین حیاتی

شاعیرین حیاتی

بالتاجی آراز آديً ایله تانيًنان محمد محمدعلی اوُغلو ۱۳۳۲- جی ایلین آبان آیيًنيًن بیرینده گونئی آذربایجانيًن، مرند بوُلگه سینده یئرلشن یوخاری دیزه کندینده دونیایا گلمیشدیر. اوُرتا تحصیلینی دوُغوما مرند شهرینده باشا چاتديًرديًقدان سونرا ۱۳۵۷-۱۳۵۳ ایللر آراسيًندا ایستانبولون میمارسنان گوزل صنعتلر اونیوئرسیته سینده آلی تحصیل آلميًشديًر.
۱۳۵۷ -جی ایلده آنا یوردونا دوُندئوکده سوُلچو تشکیلاتيًن اوزوی کیمی اووه ل جه شاه رئژیمینه، سوُنرالار ایسلام حاکیمییتینه قارشی موباریزه آپارديًغيً ایللرده عینی زاماندا ادبی چاليًشمالاری ایله ده مشغول اوُلموشدور. همین ایللرده ایلک شعیرلری تهران دا یایيًلان "یولداش" درگیسینده اشيًق اوزو گوُرموشدور.
۱۳۶۸ -جی ایلده اوُلوم تحلوکسی قارشيًسيًندا آنا یوردو مرند شهرینی ترک ائتمک مجبورییتینده قاليمًش، آلمانیایا سيًغئناراق سییاسی فعالییتینی بورادا دوام ائتدیرمیشدیر.
بالتاجی آراز اوُز مقاله و شعیرلرینده پهلوی سولالسی زامانی، ائلجده همین تفکورون دواميً اوُلان بوگونکی ایران ایسلام رئسپوبلیکاسيًندا فارس شوُونیزمی نین هئگه موُنلوغو و باسقيًسيً آلتيًندا میللی و دینی ظولمه معروض قالميًش آذربایجانيًن و آذربایجان تورکلرینین پروبلئملرینی، تاپتالانميًش دوُغال حاقلاريًنی دیله گتیرمیش، یازدغيً اثرلرینده آذربایجانيًن اوُزگورلوک (ایستیقلال) مفکورسینی بيليمسل، فلسفی، سياسی، حوقوقی، ايقتيصادی، ... اساسلاريًنيًن نظری تحلیلینی وئرمیشدیر.
شاعیر یاراديًجيًغيًندا پارچالانميًش بیر خالقيًن آنا یوردوندان دانيًشيًر. گونئی ایله قوزئی آذربایجانيًن بوتُولشمسی حاققيًندا دوشونجسینی اوُرتایا قویور.

شاعیر یازيًر:

اوُ تای ایله بو تای واحید بیر جانديًر،  آدی اوُدلار یوردو آذربایجانديًر!

شاعیر "اوُ تای، بو تای وطندیر" آدليً اثرینده اوُخوجویا بوتُو آذربایجان ایدئیاسئنيً آشيًلایير، ملتیمیزین سییاسی و میللی باخيًمدان شعورلانماسي ایشینه اوُز پایيًنيً وئریر. اوُ، بو اثرینده خالقيًميًزيًن بوتُو آذربایجان آرزوسونو، ایسته یینی یانسيًدان و یورد سئور اورکلرده بوتُو آذربایجان بایراغئنيً دالغالاندئران گولوستان پوئماسيًنيًن یاراديًجيًسيً اوُلان اونودولماز خالق شاعیریمز بختییار واهاب زاده یه ایتحاف ائتمیشدیر.

شاعیر بالتاجی آرازيًن دیگر اوُنملی اثری اویقارلاش آدليً کیتابيًديًر. شاعیر بو اثرینده اینسانلارييً اویقار، مدنی و چاغداش اوُلماغا، اوُز حاقلاريًنيً تانيًیيًب قوروماغا چاغيًريًر. اوُ، آذربایجان تورک خالقيًنيً ایسلاميًن گئریجی احکاملاريًنا، ارقيًچيً فیردوسو سایاغيً آنتی قاديًن دارگوروشلو باخيًشلارا اویماماغا سه سلییر. اوُ قاديًن حاققيًندا دار گوُروشلو باخيًشلاريً، تورک کولتورونۀ وایجتیماعییه تینه آشيًلانميًش ایرتیجاچی و گئریده قالميًش دوشونجۀ نی تانيًديًر، چاغداش اینسانا یاراشان باخيًشلاريًنيً اوُرتایا قوُیور. اوُنون فیکرینجه، قاديًن آزادلغيً هر اوُلکۀ ده اوُنون مدنییه تی و اینسان حاقلاريًنيً تانيًماق اوُلچوسودور.
شاعیر دئییردی، آزاد آنا، آزاد اوُلاد یئتیشدیره ر، اینسان سئوه رلییی و اوُزگورلویو اوُنون روحونا آشيًليًیار. آزاد روحلو اینسان کوُلۀ اوُلماز، کوُلۀ ائتمه ز و هر زامان اوُز حاققيًنيً آرایيًب آلار.
بالتاجی آراز عمرونون سوُنونا ده ک گونئی آذربایجانيًن اوُزگورلویو، ائلئجه ده ائرمنی داشناکلاريً طرفیدن ایشقال اولونموش قاراباغيًن آزادليًغيً اوغروندا قلمی ایله موباریزه آپارميًشديًر. بو مسله لر حاققيًندا حاضيًرلاديًغيً "تبریز ایله قاراباغيًميًزيً کیم قورتاراجاق؟" آدليً کیتابيًندا اوُ تای ليً - بوتایليً سویداشلاريًميًزيًن اوُرتاق دردی - ایشقالدا اوُلان توُرپاقلاريًميًزيً دوشونمک و بیرگه چيًخيًش یوُلو ایله باغليً دوشونجه و فیکیرلرینی یازميًشديرً.

اوریی خالقلا دوُیونن شاعیریمیز اوُمرونون سون دقیقه لئرینده آذربایجانا حصر ائتدییی نوُوبتی شعرینی یازارکن ۱۳۹۱- جی ایل تیر آیيًنيًن بئشینده سحر ساحات ۵ ده، ئوره ک اینفارکتيً گئچیره ره ک دونیاسيًنيً ده ییشمشدیر. شاعیر ۱۳۹۱- جی ایل تیر آیئنئن سگیزینده آلمانی یانيًن مونستئر شهرینده کی لاوهای ده مزارليًغيًندا تورپاغا تاپيًشئرئلئب.

یورد سئورگونئی آزربایجانيًن ایستیقلال شاعیری بالتاجيً آرازدان آشاغيًداکيً:
"اویقارلاش،
اوُ تای، بو تای وطن- دیر،
تبریز ایله قاراباغيًميًزيً کیم قورتاراجاق؟
آذربایجان حاملۀ استقلال است" آدليً اثرله ری یادیگار قالميًشديًر.

شاعیر اوُز ثمه ره لی یاشاميًنيً سئودییی وطنینین و خالقيًنيًن آزادليًغيً یوُلوندا ارمغان قوُیموشدور. اونون اثرله ری ۱۳۸۲- جی ایلدن ائتیبارن آزاد تریبون و سول گوناذ اینتئرنئت سیته له رینده یایيًملانماقداديًر.