۴۲ - دئييرم گلين اوزوموز اولاليًم!
دئييرم گلين اوزوموز اولاليًم!
719
سوموروچو ارباب پيسليک اويره تير
رعييت اويره نديگینی اوره تير
گورورسن نه فاجيعه لر توره دير؟
دئييرم گل اوز يازقيًميًزی يازاق
اوزگه يازديًران يازقيًلاری پوزاق
720
دئييرلر کيمسه نی ديرلنديرمه
يئرينده سايانی ديًغيًرلانديًرما
داشيًديًغی يوکو آغيًرلانديًرما
دئييرم قورور جهلینی قيًناماز
ديرلنمه ين اوزونو تانيًماز
721
دئييرلر جهلين محصولو قوروردور
جهلینی قورويان قورور شروردور
قورورلو آدامدان قاچماق ضروردور
دئييرم جهلدير کی، شرير ائدر
آغيًلانديًرسان اوز يولونو گئدر
722
دئييرلر دوه اوز عئيبینی بيلمز
جهلين يازديًرديًغی يازقيًنی سيلمز
ياپيًجی اولمايانيًن ايچی گولمز
دئييرم گلين اوزوموز اولاليًم
اوزوموز اولماغا چاره بولاليًم
723
دئييرلر قورورا درس وئرمک اولماز
قورورلو آداما ال سورمک اولماز
اونونلا اورتاق بير ايش گورمک اولماز <<<
دئييرم قورور جهلين مئيوه سیدير
هم ده آغيًر سيلاحلی قوووه سیدير
724
دئييرلر منطيقلی اينسان تارتيًشار
چوزدويو دآوآلار بير- بير ياتيًشار
آنلاشديًغی اينسانلارا قاتيًشار
دئييرم منطيق علمين مئيوه سیدير
فيکير گليشديرمه يين شيوه سیدير
725
دئييرلر قورور يئمز، چيًخار، گئدر
هم ده اينسانلاری ديکتاتور ائدر
ديکتاتور تنقيدچیلرینی ... ديدر
دئييرم قورور ييًخيًجی قوووه دير
جهله ديکتاتور اوره دن نووه دير
726
دئييرلر قورورلو اينسان جاهيلدير
يئری دنيز ايچی دئييل، ساحيلدير
قايناييًب- قاريًشا بيلمز آهيًلديًر
دئييرم قورورلو آدام منجيلدير
دئيشلانان زيبيلين يئری هينزيلدير
727
دئييرلر هر کس اوزونو اوز سانار
دوه تکين ايریسینی دوز سانار
سئوديگی تنقيدچیسینی کوز سانار
دئييرم تنقيد حاققیًن وئر اوره گه
وئرمه قوروردان بسلنن ديله گه
728
دئييرلر آتی آت يانيًندا قويون
يا حاليًنی گوتورر، يا دا خويون
گور- گوتور قورد ائدر، ياخود دا قويون
دئييرم پيس ائتکیلردن قاچيًنيًن
اوره گين اينصافی ايله کئچينين
729
دئييرلر پيس ائتکیدن پيسليک دوغار
اوره گين بولودوندان اينصاف ياغار
اينصافا گوز يومان اينسانی ساغار <
دئييرم نئجه دونيا يومورودور
اينصافا گوز يومدوران سومورودور
730
دئييرلر اوره ک ايستر حئيوا يئيه
يئييله جک واختينی (...) آغيًل دئيه (گرک)
يوخسا تاماح سالماق اولماز هر شئيه
دئييرم آغيًل (a) هم قويون اوتارار
(b)هم ده کوله چی اليندن قورتارار
(آغيًل هم اينصافا، هم ده ظولومه قوللوق ائدر.)
731
دئييرلر هر کس اوزون حاقلی بيلر
حاقلی بيلديگی اوچون سوزه گلر
حاقسيًز سوزو ايله اوره گی دلر
دئييرم حاق ندير؟ اويرنمه لیييک
حاقسيًزليًق ائدندن ايرنمه لیييک
732
دئييرلر حاقلی حاقسيًزليًق ائيله مز
اوز خئيرینه گوره ضرر ديله مز
هر ديله گين اويونونا گله مز
دئييرم قاضی هر کسين اوزودور
اوزونو يانسيًدان اوره ک سوزودور
733
دئييرلر اوره گی دينله ين يوخدور
چاميًر آتانلاری اونله ين يوخدور
اينصافسيًز ائدنی دانلايان يوخدور
دئييرم اينصافی آرايان بولار
سوموروچوآدام اينصافسيًز اولار
734
دئييرلر هر کس اينصافدان دانيًشيًر
هم ده اينصافسيًزجا ايشه قاريًشيًر
سانکی اينصافسيًزلار ايله ياريًشيًر
دئييرم ده وه اوز عئيبینی بيلمز
يوخسا عئيبی نين اويونونا گلمز
735
دئييرلر هاردا اوره ک قاضی دئييل
ديله گی اينسانسئور آرزی دئييل
اينصافسيًز اولدوغوندان راضی دئييل
دييرم اوره گين سوزونو دينله
اوره ک سئومه ين ديله گینی اونله
736
دئييرلر کيم اولا بيليب بخته ور؟
مشهدی عيبادمی؟ يوخسا دا سرور؟
اينصافسيًزلاری سئومز اينسانسئور
دئييرم سوموروچو اينصافسيًزديًر
مشهدی عيباد تکين شرفسيزدير
737 *- سومورو چاغيًندا
دئييرلر گوج شکيل وئرر هر شئيه
ايشلمه يه نين حاققی يوخدور يئيه
قوروجونون حاققی وار منم دئيه
دئييره م (a) مئيوه سيز آغاج اگيلمز
(b)آلچاق کونولونون حاققی وئريلمز*
738
دئييرلر منجيل آداملار پيسدیلر
چونکو تنقيدچیلريندن کوسدولر
کوسدورن فيکيرلری نجيسدیلر
دئييرم آغيًلسيز يولوندان ساپار
سورودن آيريًلانلاری قورد قاپار
(سويوندان آيريًلانلاری قورد قاپار)
(صينفيندن آيريًلانلاری قورد قاپار)
739 *- اونودماييًن!
دئييرلر منجيل "اوز" يولونو گئدر،
تنقيدچیلرینی قورد تکين ديدر،
هانسی فلسفه اوز باشيًنا ائدر؟
دئييرم دين فلسفه سینه گوره،*
ايستر آلله اولا کی، ائده کوله. <
740 *- مينيش وئرمه يه نی مينمزلر.
دئييرلر دين آللاها کوله ائدر
کوله کوله چی نين يولونو گئدر
بو سببدن امه گی اولار هدر
دئييرم خالقی يونه لدن اونچودور
اونچونو ديکتاتور ائدن دينچيدير*
(اوز باشيًنا يئتيشديرن دينچیدير)
741 *- ايفتيراچی دوستلاری تانی!
دئييرلر باجاريًقـسيًز قيًسقانج اولار
اوزانميًش بويونو وورماغا دالار <<<
وورا بيلمه ديگینی درده سالار*
دئييرم آلچاق اوزونو آلچالدار
قازديًغی قويونون ترکینه چاتار
742 *- اوز صينيفی نين کيتابيًنی اوخو!
دئييرلر اينه تکين لوت گزيرلر
لوت گزنلری آلچالديًب ازيرلر
دئمک کی، اوزلرینه گور قازيًرلار
دئييرم پيسليگی ارباب اويره در
رعييت اويره نديگینی اوره تر*
743
دئييرلر هر کسين کی، واری چوخدور
سانکی قارنی تکين آغلی دا توخدور
اوزوندن يوخسولا حورمتی يوخدور
دئييرم آغيًلسيًز آشچيًليًق ائتمز
آشچيًيا باشقاسی باشچيًليًق ائتمز
744
دييرلر "دوزسوز آنا قيًزسيًز اولار"
تک آشچیًلی ايش يئری سوزسوز اولار
يوخسا آش دوزلو، ياخود دوزسوز اولار
دئييرم هدف آينی اولماليًديًر
يونه لدن ذووق يونتمی بولماليًديًر
745
دئييرلر ايش وئريلر ايش گوره نه
وئريلمز فيکير ايره لی سوره نه،
ايش گوره نين آرخاسيًنجا هوره نه
دئييرم يئتيمه وای- وای دئمه يين
چوره ک وئرنين حاققيًنی يئمه يين
746
دئييرلر ايش گورمه گه گوج لازيًمديًر
دوووشمه گه کلله لی قوچ لازيًمديًر
قوچ کوراوغلوسوز ائله کوچ لازيًمديًر
دئييرم هر کسين بللی گوجو وار
گوردوگو ايش قدر قازانديًرار کار
747
دئييرلر ذووقلر عئينی دئييللر
اوزگه لر اوزگه نين بئينی دئييللر
بسله ييب- بويودن قوينو دئييللر
دئييرم هر کس هر دالدا گوجلودور
يوخسا اوزو يوخ، شرايط سوچلودور
748
دئييرلر شوهرت وورغونو گوز اويور
يارديًملاری اوز حئسابيًنا قويور
شوهرتسيز قالاندان بسلنن دويور
دئييرم شوهرت وورغونو اولماييًن
يوخسا يولداشيًن حاققيًنی چالماييًن
749
دئييرلر حاق اوسته ساواشان چوخدور
اوستنديگی گوره ودن خبر يوخدور
حاق سوز حاقسيًزلارا زه هرلی اوخدور
دئييرم قيًسسالمايان سوز اوزانار
ايسته نيلن حاققی عمل قازانار
750 *- قوللانيًليًب- آتيًلان منديل اولما!
دئييرلر هر کس قوروجو اولاماز
يئللی دنيزده سوروجو اولاماز
هر گلن اوزاق- گوروجو اولاماز
دئييرم باجاريًقـسيًز بولانديًرار
آغيًزلاری بوشونا سولانديًرار
داغ آييًسی اوزونو قوللانديًرار*
751
دئييرلر پروبلئمی چوزمکگرک
پروبلئم چوزمک اوچون دوزمک گرک
چوزوم يولو پئشينده گزمک گرک
دئييرم "گزن آياغا داش دير"
تجروبه سيز دوزه لده بيلمز اير
752
دئييرلر آليًشماسانيًز يانماييًن
سهولی دوسلاری دوشمن سانماييًن
قويدوغو امکلرینی دانماييًن
دئييرم هر کس بير يوکو داشيًيار
يوکو داشيًنان ائل خوشباخت ياشيًيار.
23.10.2008